Gipagawas na ang cease and desist order sa Department of Environment and Natural Resources (DENR) 7 pinaagi sa Community Environment and Natural Resources Office (CENRO) Argao aron permanenteng hunongon ang pagpamutol og kahoy sa lungsod sa Oslob.
Apan giingong ulahi na ang tanan tungod kay nahurot na og pamutol sa mga trabahante ang napulo ka mga kahoy nga gamiton alang sa itukod nga bag-ong sports and cultural complex sa maong lungsod.
Napadayag sa iyang kasubo ug kapungot si Atty. Charlemagne Cuevas, ang Legal Counsel sa Purok Pabula PH, atol sa eksklusibong pakighinabi sa Bombo Radyo Cebu kaniya, kini gumikan sa kalit nga paghurot og putol sa mga kahoy sa mismong adlaw sa wala pa mogawas ang kamanduan sa DENR.
Matod niya, gidali-dali ang operasyon ug wala na hulata ang tingog sa mga residente, apan bisan pa man niini, dili hingpit nga useless ang kamanduan tungod kay mapugngan man niini ang pagpatay sa mga gamot aron aduna pay purohan nga manalinsing pa ang mga kahoy.
Hinuon, giklaro sa legal counsel nga wala sila hingpit matagbaw sa temporaryong kamanduan sa rehiyonal nga buhatan sa DENR tungod kay magdepende ra gihapon kini sa pagsunod sa lokal nga kagamhanan sa Oslob.
Gumikan niini, determinado ang ilang pundok nga ipadayon ang pagduso sa ilang suwat ngadto sa nagkadaiyang buhatan sa DENR aron hingpit nga ipaundang ang tibuok konstruksyon sa sports and cultural complex sa public plaza tungod kay aduna pa may laing lugar diin pwede kini ipatindog.
Ang maong plaza nga gikan sa panahon sa Espanyol gipanalipdan ubos sa National Cultural Heritage Act isip Grade II cultural properties, ug ang pagtukod sa bag-ong pasilidad nakahatag og hulga sa panagway sa mga makasaysayanong landmark sama sa Old Municipal Building, Cuartel, ug Inmaculada Concepcion Parish.
