VISAYAS-Sugdan na sa mga nagkadaiyang Local Government Units (LGU) sa lalawigan sa Sugbo ang paglukat sa bugas humay nga ibaligya sa mga konstituwente niini nga tag P20 per kilo sumala pa sa Kapitolyo.
Kini ang gipahibalo sa kagamhanang lalawigan sa gipahigayong coordination meeting niin sa mga Mayor sa nagkadaiyang LGU diin mag-una ang Sugbo sa programang giduso sa Department of Agriculture (DA) subay sa kamandoan sa kasamtangang administrasyong Marcos Jr.
Magsugod ang roll-out niini sunod semana sa hinapos sa Abril nga ipadagan pinaagi sa Sugbo Merkadong Barato (SMB) Program sa Kapitolyo nga unang nalusad niadtong Nobyembre 2023.
Atol sa coordination meeting, gipahibalo nga ang mga component cities ug municipalities sa lalawigan kay maglukat na sa stock sa sinakong bugas gikan sa warehouse sa Kapitolyo aron masugdan og baligya sa Lunes, Abril 28.
Kahinumduman nga niadtong Miyerkules Abril 23 gipahibalo ni Agriculture Secretary Francisco Tiu Laurel Jr. nga ang national government muabaga sa hapit katunga sa subsidiya samtang muagak sab ang LGUs nga unang gilusad sa Visayas.
