CEBU CITY-Midangop ang pipila ka mga magtutudlo sa usa ka pribadong training and assessment center sa buhatan ni Mayor Raymond niadtong Enero 22, 2025, aron mangayo og tabang kay giingong wala sila makadawat og saktong sweldo.
Daling giaksiyonan sa mayor ang mga reklamo sa daghang magtutudlo, inubanan ni Atty. Jigo Dacua, ang head sa Local School Board (LSB), kinsa gimanduan dayon ni Mayor Garcia sa pagsiguro nga mahatagan og hinabang ilabi na sa pagpasaka og tukmang mga reklamo.
Gimanduan usab sa mayor ang LSB nga makig-alayon sa Department of Social Welfare and Services (DSWS) sa dakbayan kalabot sa posibleng tabang sa maong mga magtutudlo.
Ingon man nga tabangan usab nila kini sa pagproseso ang ilang aplikasyon aron makasulod sa Department of Education (DepED).
Gipaubanan usab ni Garcia kang Atty. Dacua ang mga magtutudlo sa Public Attorney’s Office.
Ug nakig-istorya na usab sila kang Dr. Nimfa D. Bongo, ang DepED Cebu City Division schools superintendent, ug DepED-7 Regional Director Salustiano T. Jimenez bahin niining butanga.
Nasayran usab nga kasagaran sa mga reklamante kay gikan sa Mindanao, sama ni Jason Jeff Rodriguez nga taga Zamboanga del Sur kinsa nipadayag sa iyang dakong pasalamat sa dali nga aksyon sa dakbayan.
Samtang, nipagawas usab og show cause order ang BPLO ngadto sa tunghaan aron tubagon ang mga reklamo nga gisang-at sa mga kawani niini ug kinahanglang tubagon usab kon nganong dili angay bawion sa siyudad ang temporaryong business permit niini.
