CEBU – Andam na ang mga magtutudlo ug mga tunghaan sa rehiyon 7 sa subli nga pag-abli sa klase karung umaabot nga Agosto 22.
Kini bisan pa man nga adunay pipila ka mga tunghaan ang padayon sa ilahang pag-‘repair’ sa mga buildings ug classrooms ilabi na niadtong hilabihan nga nagusbat sa bagyong Odette.
Gisiguro ni Dr. Salustiano Jimenez, ang regional director sa DepEd 7, nga bisan pa man nga nagpadayon ang pipila ka mga konstruksyon, giingong adunay mga contingency plan o mga stratehiya arun nga mahinayon ang pagpahigayon sa mga klase karung Agosto 22.
Sa pagkakarun, nagpadayon ang ilahang caravan sa Brigada Eskwela 2022 diin pinaagi usab niini kay nakatigom ang departamento ug mga donasyon gikan sa nagkadaiyang ahensya, non-government organizations (NGOs) ug sa mga Local Government Units (LGUs).
Gitutokan sa DepEd karun nga luwas ang mga tinun-an nga mubalik sa mga tunghaan karung Agosto 22, ingon man ang full in-person classes sa umaabot nga Nobyembre 2.
