CEBU – Naluwas sa Philippine Coast Guard Tudela Sub-station ang unom ka mga mananagat nga milawig sa kadagatan bisan pa man sa pagkuso-kuso sa bagyong Dante sa amihanan nga bahin sa Sugbo.
Giila ang maong mga mananagat nga sila si Arturo Nipaya, 46 anyos, ang kapitan sa motorbanca; Jenny Agbay, 18 anyos; Ardie Dumdom, 29 anyos; Jay Michael Agbay, 26 anyos; Nestor Marcado, 26 anyos; ug Petronilo de Gracia, 25 anyos, ug kini pulos mga residente sa Barangay Baliwagan, lungsod sa Balamban.
Base sa pakighinabi sa PCG-Tudela sa kapitan sa motorbanca, gibutyag ni Tudela, Camotes Mayor Greman ‘Jojo’ Solante, nga alas singko kagahapon sa buntag sa dihang milawig ang maong mga mananagat apan kalit nga naputol ang propeller sa ilahang gisakyan nga motorbanca samtang nagkakusog usab ang uwan ug balud.
Matud pa sa mayor nga wala na makita sa kapitan ang mga nakapalibot nga isla o bisan unsa man nga baybayon hinungdan nga nagpalutaw-lutaw na lang kini ug nagpadala sa sulog sa tubig ug kung asa kini sila dalhon sa hangin, hangtud nga ilahang nakita ang baybayon sa Fr. Joseph Weirtz Bayview Park nga anaa lang usab sa luyo sa PCG-Tudela Sub-station ug dali sila nga nakapangayo ug tabang.
Nasayran nga rehistrado sa PCG-Toledo ang FBCA Roldan, ug gumikan sa insidente nasayran ni Mayor Solante nga wala kini permit gikan sa LGU sa Tudela, Camotes nga makapanagat sa ilahang municipal waters. Hinuon, gitataw sa opisyal nga hatagan lang kini ug konsiderasyon gumikan kay disgrasya man usab ang nahitabo.
