CEBU – Nikatap sa social media ang labot sa giingong pagpanulis sa mga menor edad sa Barangay Kamagayan, Dakbayan sa Sugbo pasado sa alas 7:00 sa Huwebes sa gabii, Oktubre 6, 2022.
Tungod niini, daling gipasusi ni Police Colonel Ireneo Dalogdog, hepe sa Cebu City Police Office, sa hepe sa Parian Police Station aron masayran unsa ka tinuod ang post sa social media.
Dinhi nasuta nga hinimuan kini sa mga menor de edad diin ilang gitiunan og kutsilyo ang usa ka babaye ug gikuha ang iyang butang dayon nisibat.
Matud pa ni Dalogdog nga basi sa pakigsusi sa kapulisan ilang nasuta nga ang nangulo sa pagpanulis giila nga si Jerlan Sabanal, nailhan usab nga Boy Langaw, kinsa gitumbok nga responsable sa nahitabong pagpanulis sa Barangay Kamagayan, dakbayan sa Sugbo.
Gitataw sa opisyal nga si ‘Boy Langaw’ nasulod-gawas sa prisohan tungod sa samang kalapasan.
Sa iyang paglingkod isip bag-ong hepe sa CCPO, gibutyag ni Dalogdog nga iyang giestudyohan ang mga crime clock ug ang dapit diin kasagaran nga mahitabo ang krimen aron mao kadto ang patutokan sa ilang deployment matag adlaw.
