CEBU – Tuyo sa Partido Demokratiko Pilipino–Lakas ng Bayan o PDP–Laban nga mapadayon ang mga nasugdan ni Presidente Rodrigo Duterte hinungdan nga gusto nila kini nga mudagan isip bise presidente sa tuig 2022.
Sa pakighinabi sa Bombo Radyo Cebu kang Atty. Melvin Matibag, ang acting General Secretary sa PDP-Laban, gibutyag niini nga makita man nga nagmalampuson ang presidente sa Pilipinas sa iyahang mga proyekto, butang nga giingong angayan lang nga ipadayon.
Matud ni Atty. Matibag nga dili nila gusto nga unhan si Presidente Duterte sa desisyon niini sa pag-endorso ug mahimong standard bearer sa partido, apan giingong daghan nang mga ngalan ug mga personalidad ang milutaw sa pagkakarun.
Kung ugaling mudagan si Duterte isip bise presidente, giingong gawasnon kini nga mupili sa kung si kinsa ang padaganon niini nga presidente ubos sa partido nga iyaha usab nga gipangulohan.
Samtang, giklaro usab niini nga wala may ‘faction’ sa ilahang partido ug magpamatuod niini ang dakong mayorya nga mitambong sa National Council Meeting kagahapon nga gipahigayon dinhi sa Sugbo.
Giangkon hinuon niini nga dili malikayan sa grupo nga adunay mga miyembro nga adunay lahi nga pagtuo ug baruganan, apan giingong mahusay lang kini sa pag-abot sa tukmang panahon.
