Pangandaman sa Police Regional Office (PRO)-7 ang engrandeng pagpahigayon sa Sinulog sa sunod tuig pinasubay sa ika-500 nga tuig sa Kristyanismo sa Pilipinas.
Kini human nga napaglantawan ni PRO-7 Director PBGEN. Valeriano De Leon nga malinawon ang pagpahigayon sa Sinulog 2020 diin namyesta ang dili moubos sa 2-milyones ka mga bisita.
Matud ni De Leon nga gisubay nila ang gipatumang mga security measures aron makahatag og excitement sa mga lokal ug langyaw nga mga turista.
Dugang pa niini nga makatabang ang signal shutdown alang sa kahapsay ug kaayuhan alang sa tanan.
Kini ang usa sa ilang gipatumang security measures subay na sa pagtambong ni Presidente Rodrigo Duterte kagabii sa Cebu City Sports Center.
Sa gihapon, nagpasalamat si De Leon sa mga Sugbuanon tungod sa ilang kooperasyon maong nagmalinawon ang pagsaulog sa Sinulog.
