CEBU CITY — Gipasabot sa Department of Health (DOH)-7 ang pagkamahinungdanon sa community mass testing sa Metro Cebu human masayud nga gamay lang ang misanong niini.
Base sa report sa Cebu City Health Department, pinaagi sa head nga si Dr. Daisy Villa, nga 195 ka mga samples ang nakuha gikan sa 2,102 ka mga target residents atol sa unang adlaw sa pagpahigayon niini.
Sa usa ka report, nagkanayon si Villa nga nipatigbabaw ang kahadlok ug kabalaka sa mga residente maong wala sila nipaubos sa rapid testing.
Matud ni Dr. Mary Jean Loreche, ang chief Pathologist sa DOH-7, nga gamit ang strategic mass testing aron makahimo og desisyon ang mga local officials kung hinay-hinayon ba ang paglibkas sa lockdown.
Hangyo pa niini nga angayang mosalmot ang katawhan kay sa katapusan, ang lokal nga pangagamhanan mismo ang makahukom sa mga public health measures.
Mipasalig usab si Loreche nga adunay gi-andam nga isolation centers sa Sugbo kun ugaling magpositibo sa mass testing ang mga target residents.
