CEBU CITY — Gikalipay sa mga opisyal sa Metro Cebu ang pag-abot sa unang batch sa mga bakuna batok sa COVID-19 gikan sa Sinovac sa higayong niabot na kini sa Sugbo.
Personal nga gisugat nilang Lapu-Lapu City Mayor Junard “Ahong” Chan, Cebu City Vice-Mayor Michael Rama, ug uban pang mga opisyal ang pagdiskarga sa maong bakuna gikan sa gisakyan niining Philippine Airline flight sa Mactan Cebu International Airport.
Gihulagway ni Chan nga susama lang ang epekto niini sa uban pang mga bakuna, bisan pa man og gidudahan sa publilko ang efficacy rate niini.
Human nga niabot na sa Sugbo ang mga bakuna, mipadayag si Chan nga andam kining maturukan sanglit nagmasaligon kini sa kaepektibo.
Samtang gikalipay usab ni Rama ang pag-abot sa bakuna gikan sa China gumikan kay dako kini og tabang aron makab-ot ang herd immunity.
Kini aron mabalik sa hinay-hinay ang dagan sa ekonomiya sa dakbayan human nga nagbunga ang pagpaningkamot sa national government.
Sa laing bahin, gibutyag ni Rama nga gitrabaho karon sa City Council ang tripartite agreement sa kagamhanan ngadto sa kompanyang AstraZeneca ug Novavax.
Naninguha, matud pa, ang kagamhanan sa dakbayan nga makabaton og dugang pang supply alang sa umaabot nga vaccine rollout.
