Gimandoan ni Tanzanian President Samia Suluhu Hassan ang tanang opisyal sa gobyerno nga mosakay og usa ka bus atol sa ilang opisyal nga pagbiyahe aron makunhuran ang konsumo sa gasolina, human sa kakulang sa suplay nga gipahinabo sa gubat sa Middle East.
Sumala sa energy regulator sa nasud, ang presyo sa gasolina misaka og halos 1/3 sukad niadtong Marso.
Nasuta nga ang entourage sa president kasagaran gilangkoban sa kapin sa 30 ka mga sakyanan, lakip ang mga luxury SUV ug mga police outrider, nga kasagarang hinungdan sa grabeng trapiko.
Hinungdan nga gimando ni Hassan, nga ng tanang opisyales nga mukuyog kaniya mosakay na lamang sa usa ka bus aron makunhuran ang konsumo sa gasolina.
Kahinumduman nga ang kakulang sa lana gipahinabo sa pagsira sa Strait of Hormuz sa Iran, diin 20% sa lana ug gas sa kalibutan ang moagi.
Tungod niini, daghang mga nasud, lakip ang Ethiopia, ang nagpatuman usab og prayoridad sa paghatag og gasolina sa mga sakyanan nga nagdala og mga importanteng butang ug pampublikong transportasyon.
