Naka high alert karon ang ospital tibuok probinsya sa Sugbo, tungod sa nagpadayong hulga sa mga kaso sa leptospirosis.
Kini nunot na sa pagbaha nga nasinati bag-ohay lang tungod sa gipahinabo sa Bagyong Tino (Kalmaegi) niadtong Nobyembre 4.
Sumala sa datos, ang kalit nga pagsaka sa impeksyon kay sugod gayud sa unang semana sa Nobyembre 2025, ug kini gikompirmar sa Cebu Provincial Health Office (CPHO) nga ang kaso sukad Nobyembre 1 hangdtud 14, mastaas kon ikumpara sa mga nilabayng buwan, ug kini sumala usab sa Department of Health 7(DOH).
Subay niini ang syudad sa Talisay adunay 8 ka mga kaso, Munisipalidad sa Consolacion 6 ka kaso, samtang ang Asturias ug Lilon adunay parehong 2 ka kaso, ug ang Argao, Balamban, Danao City, Medellin ug Sibonga, adunay nag inusarang kaso.
Samtang adunay gimonitor usab nga daghang suspected cases ug usa ka suspetsadong namatay nga gihulat pa ang kumpirmasyon, ilabi na sa Balamban ug Bogo City.
Gani gikabutyag ni Dr. Josephine Arsenal sa CPHO, nga ang 23 ka kaso sa duha ka semana halos katunga sa 90 ka kaso nga natala gikan Enero 1 hangtod Oktubre 31, diin 11 niini namatay nagpamatuod nga usa kini ka kaseryosong sakit.
Sa pikas bahin, gipaambit usab ni Cebu Province Health Consultant Nicole Catalan, ang sitwasyon kay mura g laing klase nga kalamidad kay ang grabe nga leptospirosis kasagarang manginahanglan og dialysis, ug nabalaka kini sa hulga sa kakuwangan sa dialysis capacity kon ugaling mosaka pa ang mga kaso.
Apan, gitataw niini nga matambalan kining susama sa mga nahisgutang kaso pamaagi sa doxycycline tablets, nga tumaron human sa inisyal exporsure sa tubig-baha.
