Gi-doble sa mga residente duol sa bulkan ang ilahang pag-amping human sa usa ka explosive eruption nga nahitabo sa summit vent sa Kanlaon Volcano nga nagsugod alas 5:51 sa buntag karong adlawa, Abril 8, 2025.
Sa pakighinabi sa Bombo News Team, kang Ma.Lyn V. Bustillo, usa ka magtutudlo sa Matagbak Elementary School, sa Canlaon City, Negros Oriental, iyahang gipa-ambit ang ilahang kasamatangan nga sitwasyon sa pagbuto pagbalik sa naasoy nga bulkan.
Dinhi, gisayasay ni Bustillo, nga nagmando ang Local Government Unit sa Negros nga ibutang kini sa ‘Restricted area’, pasabot nga wala’y bisan kinsa nga gitugutan nga makasulod o makagawas sa 6-kilometer extended danger zone.
Dugang pa, nga anaa na sa tulo ka bulan ang pipila ka mga residente sa evacuation area, isip pagpangandam sa hulga sa pagbuto sa maong bulkan.
Samtang, ang mga indibidwal sulod sa 6 ka kilometro dili usab tugutan nga mobiya, alang sa ilang kaluwasan.
Dugang pa ni Bustillo nga ang ash fall sa Negros Oriental nga iyang gipuy-an mas ubos ug mas gamay kon itandi sa Negros Occidental nga mas apektado sa ash fall kay tungod kini sa pagbuto nga adunay dala nga hangin.
Sa pagkakarun, nagpabilin silang luwas ug nakadawat usab sila og tabang gikan sa Local Government Units.
Sa pikas bahin, gikumpirma sa Kanlaon Volcano Observatory nga ang Mt.Karong Abril 8, 2025, alas 5:51 sa buntag.
Atol sa pakighinabi sa Bombo Newsteam kang Engr. Mari Andylene Quintia, resident volcanologist, usa kini ka eksplosibong pagbuto tungod sa magmatic unrest nga nagsugod sa pagbuto niadtong Disyembre 9, 2024.
Gibanabana nga moabot sa 4,000 metros ang gitas-on sa abo nga gibuga sa bulkan paingon sa Habagatan-kasadpang bahin sa La Castellana ug La Carlota City.
Ang tanan nga mga residente sa sulod sa 6-kilometros nga permanente nga danger zone luwas na, tungod kay sila gipabakwit kaniadtong Disyembre. Hinuon, gitambagan ang mga residente nga nagpuyo palibot sa bulkan nga magpabiling alerto ug andam.
