Gikumpirma sa Diocesan Shrine ug Parish of San Miguel Arcangel sa San Miguel, Bulacan nga gikawat ang mga sagrado nga butang sa ilang patron, nga nadiskubrehan nga nawala gahapong adlawa dungan sa pag-obserbar sa Sabado Santo.
Lakip sa mga gikawat nga butang mao ang usa ka pako, usa ka shield, usa ka bangkaw ug usa ka espada, nga pulos hinimo sa silver.
Sumala sa parokya, kini nga mga butang simbolo sa debosyon sa mga tawo sa San Miguel ug kabahin sa kasaysayan ug pagtuo sa mga tawo nga dili matupngan sa bisan unsang presyo.
Niining bahina, ang Kura Paroko ug Bikaryo sa Parokya nanawagan sa naghupot sa mga sagrado nga butang nga ibalik kini sa Simbahan ug respetuhon ang ilang kabalaan.
Giawhag usab ang publiko nga ipahibalo ang opisina sa parokya ug ang San Miguel Police Station sa impormasyon aron ang nawala nga bililhong mga butang sa patron sa simbahan mabalik.
