CEBU CITY- Misaka ang gidaghanon sa mga nagparehistrong sakyanang pandagat nga mosalmot sa Fiesta Señor seaborne procession sa wala pa ang deadline niini karung adlawa Enero 10, 2025.
Kini ang pamahayag ni Coast Guard Ensign Jan Abel Lomboy, ang tigpamaba sa Philippine Coast Guard District Central Visayas sa eksklusibo nga pakighinabi niini sa Bombo Newsteam diin sa kasamtangang datos anaa na sa 160 sa mga sakyanang pandagat ang nakaparehisto.
Gilangkoban kini sa 107 ka mga motorbancas, 21 ka mga passenger vessels, 14 ka mga tugboats, 8 ka mga speedboats, 5 ka mga yacht ug uban pa.
Aron masiguro ang kaluwasan, ang PCG Central Visayas nipagawas og listahan sa mga angay ug dili angay buhaton sa prosesyon.
Kung diin, ang mga pasahero kinahanglang magsul-ob ug life jacket, ang mga barko kinahanglan nga dili mag-overload ug ang mga designated navigational route nga gitakda sa PCG kinahanglang sundon.
Ang gidili nga mga kalihokan naglakip sa paglabay sa basura ngadto sa tubig, pag-inom og alkoholikong ilimnon ug pagdala og hait nga mga butang, armas, o ilegal nga mga butang.
Ingun man ang paglangoy duol sa mga barko ug ang wala kinahanglana nga paglihok gidili usab.
Ang mga partisipante nga gustong mogamit ug drone kinahanglang mangayo og pagtugot gikan sa ilang tagsa-tagsa ka local government units.
