MANDAUE CITY-Mokabat sa 260 ka mga security personnel ang ipakatap sa Mandaue City Police Office (MCPO) sa walo ka dagkong simbahan sa Mandaue ug walo ka dagkong sementeryo alang sa umaabot nga kasaulogan sa All Saints and All Souls’ Days karong Nobiyembre 1 ug 2.
Ang Deputy City Director for Administration ug tigpamaba sa MCPO nga si Lieutenant Colonel Franco Rudolf Oriol miingon nga sugdan nila ang deployment sayo pa sa alas 4 sa buntag sa Nobyembre 1.
Matod ni Oriol nga nagpaabot pa sila sa kamanduan sa Mandaue City Government kon mopatuman ba sila og curfew sa oras sa pagbisita sa mga sementeryo.
Dugang pa, nga ilang gipaabot nga mokabat sa 30,000 ka mga tawo ang mobisita sa siyudad atol sa selebrasyon ug mosalmot sa Barangay ug Sangguniang Kabataan Elections (BSKE) karong Oktubre 30.
Sa miaging tuig, gibana-banang 25,000 ka mga tawo ang nibisita sa mga sementeryo sa Mandaue atol sa All Saints ug All Souls’ Days.
Hinungdan nga gipahinumdoman niini ang publiko nga likayan ang pagdala og mga kontrabando, sama sa hait nga mga butang ug dagkong mga speaker nga makabalda sa kasulob-on sa selebrasyon atol sa pagbisita sa sementeryo.
Gi-discourage usab niya ang mga ginikanan sa pagdala og mga bata, ilabina ang mga masuso.
