Padayon nga nangandam ang mga senador sa pagsugod sa impeachment proceedings batok kang Bise Presidente Sara Duterte.
Matod ni Senador Sherwin Gatchalian, niabot siya ug nakita niya ang mga robe nga gamiton sa mga senador nga magsilbing mga hukom sa impeachment trial.
Gani, kasamtangan niyang gibasa ug gitun-an ang impeachment rules ingon man ang articles of impeachment batok sa bise presidente.
Paambit sa senador nga sa annex nga gipadala sa kamara, wala pa’y konkretong ebidensiya, busa maghuwat siya sa mga testigo ug ebidensya nga ipresentar sa prosekusyon.
Sa laing bahin, si Senador Joel Villanueva mikonsulta na sa nagkadaiyang mga mahistrado ug eksperto bahin sa proseso sa impeachment.
Saysay ni Villanueva, ilang gitun-an ang tanang posibleng senaryo lakip na ang legalidad sa pagbalhin sa impeachment gikan sa 19th Congress ngadto sa 20th Congress.
Ingon man nga giangkon ni Villanueva nga nabati na niya ang kabug-at sa responsibilidad nga anaa sa ilang senator-judges kalabot sa impeachment proceedings.
