Tutukan sa sunog nga pagdungog ang giingong ‘unexplained wealth’ ug ang mga isyu sa Statement of Assets, Liabilities, and Net Worth (SALN) ni Vice President Sara Duterte, diin gimando ang pagpatawag kang kanhi Senador Antonio Trillanes IV ug pipila ka mga ahensya sa gobyerno.
Sumala ni House Committee on Justice Chairperson Gerville Luistro, ang komite nag-isyu og subpoena alang kang Trillanes aron mapugos siya sa pagtambong sa hearing nga gikatakda sa Abril 22.
Si Trillanes giisip nga kabahin sa impeachment complaint ni Saballa et al, ilabi na sa isyu sa wala matino nga bahandi sa Bise Presidente.
Gawas sa kanhi senador, gikumpirmar usab ni Luistro nga giimbitar ang mga opisyal gikan sa Anti-Money Laundering Council (AMLC).
Gilauman usab nga isumiter ang mga dokumento nga may kalabotan sa mga transaksyon sa bangko sa magtiayong Sara ug Manases Carpio.
Ingon man nga gipaabot nga motambong sa hearing ang mga representante gikan sa Securities and Exchange Commission (SEC), Bureau of Internal Revenue (BIR), ug Office of the Ombudsman.
Ang gikatakdang miting sa komite magsilbing clarificatory hearing aron maklaro ang mga pasangil batok sa bise presidente, lakip na ang giingong dili kompleto nga deklarasyon sa iyang mga kabtangan ug bahandi.
Samtang, giklaro ni Luistro nga iyang gibilin ang katapusang desisyon kung isumite ba pag-usab si Ramil Madriaga, ang gitawag nga self-proclaimed bagman, sa mga miyembro sa komite alang sa umaabot nga mga imbestigasyon.
