Nasamdan ang lima ka indibidwal lakip ang duha ka sundalo ug tulo ka sibilyan human gilabayan og granada ang usa ka military truck sa duha ka wala pa mailhing suspek nga nagsakay og motorsiklo sa Shariff Aguak, Maguindanao del Sur, alas 6:26 sa buntag Hulyo 18, 2026.
Ang duha ka personnel sa 2nd Scout Ranger Battalion (FSRR, SOCOM, PA) nakaangkon og samad sa tiil ug tudlo tungod sa shrapnel.
Samtang, tulo ka sibilyan ang naigo usab, lakip ang usa ka 24-anyos nga mosque janitor ug duha pa ka indibidwal nga nakaangkon og samad sa abaga, bukton, ug dughan.
Nahitabo ang insidente sa Roundball, Barangay Mother Poblacion, diin giatake sa mga suspek ang military truck nga gisakyan sa mga Scout Ranger samtang nagbiyahe gikan sa Old Provincial Capitol padulong unta sa Isulan.
Base sa inisyal nga imbestigasyon, gilabay sa duha ka lalaki nga nagsakay og itom nga motorsiklo ang gituohang hand grenade ngadto sa trak sa militar sa wala pa mipasirit palayo. Narekober sa mga otoridad ang usa ka safety lever sa granada sa crime scene.
Dinalian nga gidala sa mga otoridad ang tanang biktima ngadto sa Bangsamoro Regional Hospital and Medical Center (BRHMC) alang sa pagtambal.
Samtang, gikordon na sa kapulisan ang lugar ug gipadayon ang imbestigasyon pinaagi sa pagrepaso sa CCTV footage, area canvassing, ug pakigtambayayong sa Provincial Explosive and Canine Unit ug Provincial Forensic Unit.
Gisusi pa sa mga otoridad ang motibo sa maong pag-atake samtang nagpadayon ang dragnet operations aron masubay ang mga suspek.
