Gipusil-patay ang usa ka 32-anyos nga magtutudlo ug kanhi finalist sa nasudnong beauty pageant samtang anaa sulod sa iyang sakyanan atubangan sa ilang balay sa San Manuel, Isabela, niadtong Biyernes sa gabii, Pebrero 13.
Giila sa kapulisan ang biktima nga si Lullete Jane Ramilo-De Guzman, kinsa runner-up kaniadto sa 2013 Miss Philippines-Earth. Base sa imbestigasyon, naglingkod ang biktima sulod sa iyang SUV kauban ang iyang tulo ka mga anak sa Barangay Cabaritan sa dihang kalit lang kining giduol ug gipaulanan og bala sa wala mailhing suspek nga nagsakay og motorsiklo nga walay plaka.
Nahitabo ang pagpamusil samtang naggawas ang amahan sa biktima aron unta ablihan ang gate sa ilang panimalay. Daling misulod ang suspek sa lugar ug makadaghang higayon nga nagpabuto sa duol una pa kini misutoy og dagan paingon sa nasudnong highway. Gideklarar nga dead on arrival si De Guzman sa Manuel Roxas District Hospital tungod sa mga samad pinusilan sa nawong ug lawas, samtang swerteng wala maunsa ang iyang mga anak apan anaa sa grabeng shock.
Padayon pa ang gihimong pakisusi sa mga otoridad sa motibo sa krimen, personal man o may kalabutan sa iyang trabaho isip magtutudlo. Sa pikas bahin, nanawagan na og hustisya ang iyang bana nga si Clifford Dela Cruz kinsa nibutyag nga nakapadala pa og mensahe ang iyang asawa sa wala pa ang hitabo nga nagpakita og kabalisa.
