Opisyal nga giila ang nahibiling mga rayna sa Miss Universe Philippines human sa Coronation Ball nga gipahigayon sa Parañaque City gabii Mayo 10.
Atol sa kalihokan, gikoronahan ang mga kandidata nga morepresentar sa Pilipinas sa nagkalain-laing international pageants ubos sa brand nga “The Miss Philippines”.
Lakip sa mga giila mao sila si Allyson Hetland isip Miss Supranational Philippines, samtang si Bella Ysmael gikoronahan isip Miss Cosmo Philippines.
Si Jenrose Javier mao ang Miss Eco International Philippines, ug si Apriel Smith mao ang Miss Charm Philippines.
Lakip usab sa mga bag-ong titulo mao sila si Nicole Borromeo isip Miss Worldwide Philippines ug Marianne Arellano isip Miss Tourism Worldwide Philippines.
Gihatagan usab og espesyal nga mga titulo ang pipila ka mga semifinalist sama nila ni Catherine Wardle isip Miss Teen Universe Philippines ug Trexy Paris Roxas isip Miss Eco Teen International.
Sumala sa organisasyon, kini ang unang higayon nga gipahigayon ang Coronation Ball aron opisyal nga itugyan ang mga korona, nga mipuli sa miaging tradisyon sa dali nga paghatag og pasidungog human sa main pageant night.
Kahinumduman nga ang korona sa Miss Universe Philippines 2026 gihatag kaniadto kang Bea Millan-Windorski sa laing koronasyon niadtong Mayo 2 sa Pasay City.
