Gihangyo ni Metropolitan Manila Development Authority (MMDA) Chairman Romando Artes nga ma-disqualify ang mga kandidato nga nagbilin sa ilang campaign materials human sa pagpangampanya.
Kini nunot sa pagpanglimpyo ug pagkolekta sa MMDA sa kapin 11.18 ka toneladang campaign materials sama sa posters, tarpaulins, ug streamers, pipila ka adlaw sukad nahuman sa adlaw sa piniliay.
Giinsister ni Artes nga kinahanglan kining ipatuman sa nasud tungod kay daghang kalat ang kanunay nga mabiyaan human sa eleksyon ug halos dili na mobalik niini ang mga kandidato.
Matod niya bisan kon mapildi ang mga kandidato ug dili na ibalik ang ilang gi-post nga campaign materials, kinahanglang ma-disqualify gihapon sila kon ilang ikonsiderar nga modagan pag-usab sa bisan unsang posisyon sa sunod nga piniliay.
Gitataw sa kadagkoan sa MMDA nga usa kini ka paagi aron manubag ang mga kandidato sa ilang kaugalingong basura, imbes nga magsalig na lang sa mga hingtungdan nga ahensya sa gobyerno sa paglimpyo sa hugaw nga ilang gibilin.
Samtang, sa miaging pagpanglimpyo nga gihimo sa MMDA human sa piniliay, si Artes niingon nga ang mga nahipos nga tarpaulin mahimong himoong eco-bags o kaha eco-friendly bricks ug hollow blocks pinaagi sa espesyal nga makinarya sa MMDA sa ilang solid waste management facilities.
