Gitugyan na kagahapon adlawa Disyembre 18, ang initial 50 ka mga modular shelter units (MSUs) sa mga residente sa dakbayan nga nabiktima og nangaguba ang mga panimalay tungod sa bagyong Tino.
Tumong sa kagamhanan sa dakbayan sa Mandaue ang paghatag og pagtagad sa mga panginahanglanon sa mga biktima nga mahatagan og temporaryong kapuy-an ilabi na nga dili na sila makabalik sa ilang panimalay tungod sa kadaut nga gibilin sa maong katalagman.
Gipaninguha usab sa kagamhanan sa Mandaue nga sa MSUs nga nahimutang sa Bayanihan Village, Barangay Guizo, magsaulog sa Pasko ug Bag-ong Tuig ang mga pamilya nga apektado sa Bagyong Tino.
Gibana-bana nga 14 ka pamilya nga gikan sa evacuation centers sa Barangay Alang-Alang ug Umapad ang mobalhin na sa MSUs karong Lunes, Disyembre 22.
Sobra sa 200 ka MSUs ang itugyan ngadto sa Bayanihan Village ug ang nahabiling 150 units i-turnover usab sunod tuig.
Nagpasalamat usab si Mayor Jonkie sa Department of Human Settlements and Urban Development (DHSUD) sa ilang pagsanong sa pagpatukod og MSUs alang sa mga naapektuhan sa bagyo tungod kay mahatagan na ang mga biktima og mas hapsay ug limpyo nga temporaryong kapuy-an.
Gawas sa Mayor, mitambong usab ang pipila ka mga opisyal sama nila ni DHSUD Assistant Secretary Johnson Domingo, DHSUD Regional Director Eva Marfil, Office of the Civil Defense Assistant Regional Director Ver Neil Balaba, Engr. Chiqui Dy sa Department of Public Works and Highways, ug mga konsehales nga sila Ben Basiga, Jen Del Mar, Fritz Villamor ug Atty. Carlo Fortuna.
Misaksi usab sa kalihokan ang pipila ka department heads ug mga representante sa offices sa kagamhanan sa Mandaue.
