Gikumpirma ni Atty. Regie Tongol, ang tigpamaba sa Senate Impeachment Court, nga nadawat na sa korte ang mga tubag gikan nila ni Rep. Tery Ridon ug Atty. Benjamin Tolosa kalabot sa ‘show-cause order’ nga gi-isyu batok sa duha ka mga prosecutor.
Diin ang pagsumite niini nakasulod gihapon sa 24-oras nga deadline nga gihatag sa korte ngadto sa duha ka prosecutor.
Sa pagkakaron, nagdumili ang tigpamaba sa korte sa pagkomento bahin sa unod sa mga tubag nila ni Ridon ug Tolosa, ug susihon sa korte ang mga gisumite, ug gilauman ang posibleng desisyon sa sunod semana.
Subay sa mga lagda sa Senate Impeachment Court, ang pasiunang silot sa paglapas sa lagda nga ‘sub judice’ mao lamang ang ‘pagbadlong’ o reprimand atubangan sa korte.
Ingon man nga kung dili gihapon matagam ang mga nakalapas, pahamtangan na kini og P30,000, uban ang posibleng mga restriksyon.
Mahimo usab nga i-refer sa korte ang kalapasan ngadto sa Korte Suprema—kung kini nahimo sa mga abogado—alang sa posibleng administratibong silot, lakip na ang disbarment o pagtangtang sa lisensya sa pagpraktis sa balaod.
Gipasiugda ni Atty. Tongol nga kining lakang dili usa ka gag order o mando nga nagpugong sa pagsulti alang sa depensa o sa prosekusyon; hinuon, gipugngan lamang sa korte ang posibilidad sa “trial by publicity” o paghusga pinaagi sa publiko kalabot sa nagpadayon nga mga proseso.
