CENTRAL VISAYAS-Striktong ipatuman sa buhatan sa Police Regional Office Central Visayas (PRO-7) ang moratorium sa prohibition sa mga tattoo sa personahe sa kapulisan nga nakalapas sa bag-ong guidelines nga giluwat sa kaulohan.
Kini subay sa pamahayag ni Police Lt Colonel Gerard Ace Pelare, ang tigpamaba sa PRO 7 atol sa press conference niini kagahapon Agosto 23, 2024.
Matod pa ni Pelare nga ang mga kasamtangang sakop sa kapulisan kay gigahinan na og tulo ka buwan nga palugit sa pagpatangtang sa ilang mga tattoo nga nakalapas sa bag-ong guidelines ilabi na kung makita kini sa higayon magsul-ob sa uniporme.
Gikonsiderar nga striktong ginadili sab base sa moratorium niadtong Hulyo 3 sa Kampo Krame ang mga tattoo nga adunay kahulogan o hulagway sama nalang sa mga malaw-ay, racist, diskriminasyon sa relihiyon o etnisidad, o mga patik nga nagpasiugda sa ekstremismo.
Ang mga aplikanteng kadete nga aduna pud nianing samang tattoo kay dayong isalikway sa Philippine National Police kung aduna silay gitago o makita nga mga tattoo.
