CEBU CITY-Gi-deploy na ang mu-abot sa 5000 ka mga law enforcers ug emergency responders para magbantay sa seguridad gikan sa Mactan Benito Airbase para sa ipahigayong Association of Southeast Asian Nations o ASEAN 2017 sa Mactan, Lapu-lapu City ugmang adlawa.
Sa pakighinabi sa Bombo Radyo Cebu kang P/Sr. Supt. Romel Cabagnut ang director sa Lapu-lapu City Police Office (LLCPO) giingon niya nga aduna nay mga police visibility sa siyudad ug mismong sa venue nga pahigayunan sa ASEAN sukad pa kaganihang umaga.
Nasayran nga adunay 1062 ka mga police sa lapu-lapu ang lakip sa gi-deploy para sa nahisgutang international event ug may mga security measures na sila para niini. Usa na niini ang pagsugod sa mas gipahugtan pa nilang check points.
Subay niini gitino usab ni Cabagnut nga padayon pa gihapon ang ilang anti-criminality campaign gumikan kay wala man nalakip ang mga naka-assign nga police niini sa ASEAN sanglit aduna may mga pulis nga gikan sa laing unit aron nga mas masiguro nga mamahimong malampuson ang maong event.
Sa karon padayon pa gihapon ang pagpangandam sa seguridad sa ipahigayong ASEAN 2017 sa Cebu ug gipa-abot pa karon sa mga kapulisan kung mahinayon ba ang plano nga signal shutdown ugma.
