CEBU CITY – Gi-umol sa lungsod sa Tudela ang “Municipal Inter-Agency Task Force N-CoV” kinsang mututok sa gikabalak-an nga 2019 novel coronavirus acute respiratory disease (N-CoV ARD) outbreak.
Matud ni Tudela Mayor Greman ‘Jojo’ Solante nga ang maong task force ang gi-umol alang sa pagkab-ot ug usa ka plano sa pakigbatok ug paglikay sa novel coronavirus.
Sigon pa nga niadto pang nakalabay nga semana ang ilahang preparasyon, una nga gipatuman ang temporary travel ban sa mga Chinese ug uban pang mga langyaw nga gikan sa China, Macau ug Hong Kong.
Giklaro ni Mayor Solante nga susama lang gihapon ang stratehiya nga ilahang buhaton niadtong mibuto ang isyu sa African Swine Fever (ASF).
Giingong buhaton nila ang mga lakang arun nga dili gayud makasulod ang maong virus.
Hinuon, gitataw sa mayor nga dili man usab sila ang frontliner gumikan kay giingong layo lang kanila ang Mactan Cebu International Airport (MCIA) hinungdan nga walay makasulod sa ilahang lungsod nga direkta gikan sa laing nasud.
Sa pagkakarun, gipahibalo ni Mayor Solante nga aduna na kini draft nga executive order alang usab sa mga precautionary measures kalabot na niining 2019 N-CoV ARD.
