Cebu City- Dili makatuo ang 20 anyos nga ordinaryo nga graduate sa usa ka state university nga siya maoy mag top sa Geologist Licensure Examination. Sa ekslusibong pakighibabi sa Bombo Radyo Cebu ni Alec Benjamin, ang nag top sa Geologist Licensure examination , gibutyag niini nga wala niini giekspektar nga siya gayud ang manguna sa 183 nga mga nakapasar gikan sa 453 ka mga nikuha sa maong board exam. Matud niini nga lisud kaayo ang exam maong wala na kini mahibulong nga gamay lang ang nakapasar.
Nalipay tuod kini sa iyahang kalampusan nga nakb-ot apan sa susamang higayon nasubo usab kini alang sa iyahang mga classmates ug mga higala nga wala nakapasar sa maong exam. Tungud niini matud ni Ramirez nga magpabilin usa kini sa Dumageuete City aron nga tabangan ang iyahang mga classmates sa ilahang review alang sa subli nga pag kuha sa board exam.
Gisaysay usab sa Bombo Radyo ni Ramirez nga wala kini musulod sa review Center inay nag group study lamang sila sa iyahang mga classmates. Matud pa nga mag set lamang sila ug adlaw aron nga magpahigayon ug group study. Dako ang pagsalig ni Ramirez nga duna gayud gi andam ang Ginoo alang kaniya maong unahon usa niya nga tabangan ang iyahang mga classmates usa siya mangita ug trabaho.
Mapasalamaton usab kini sa iyahang pamilya sa walay puas nga suporta nga gihatag kaniya hilabi na sa iyahang amahan nga maoy nag atiman kanila sa dihang namatay ang ilahang inahan niadtong tuig 2011 ug sa mga tawo nga misalig gayud sa iyahang kapasidad.
Tambag niini sa tanan huilabi na sa katong mga nakasinati ug kapakyasan hilabi na sa mga board exam, matud ni Ramirez nga ang exam results ang dili makadefine sa usa ka tawo inay ang pagsalig niini sa Ginoo ug ang iyahang paningkamot.
Si Ramirez ang gradwado sa Negros Oriental State University sa kursong Bachelor of Science in Geology ug mao kini ang una nga higayon nga miskuha sila sa maong licensure examination.
