Cebu City-Ang dili maayo nga pagtratar sa mga piniriso sulod sa Cebu City Jail maoy gitumbok nga hinungdan ni Marvin Gimpeso kinsang miikyas sa maong jail facility niadtong Lunesd sa kaadlawon. Kaganihang alas 10 sa buntag , gikuha ni Cebu City Councilor Dave Tumulak si Gimpeso didto sa gipuy-an niining balay sa baranggay Suba ning dakbayan sa Sugbo human nga makadawat ug taho gikan sa mga lumulupyo sa nahisgutang baranggay kabahin sa presensya sa maong piniriso.
Matud ni Konsehal Dave Tumulak nga kagabie pa unta musurrender kaniya si Gimpeso apan wala na sila mag abot sanglit nipauli na kini human sa pag brownout. Matud pa ni Tuymulak nga base sa estorya ni Gimpeso, wala kini makauyon sa gihimong pagpanagmal matud pa kanila sa mga nagdumala sa Cebu City Jail ingon man sa mga pagkaon nga gihatag kanilang mga piniriso.
Gibutyag pa niini nga dili makadawat si Gimpeso sa iyang kahimtang sanglit matud pa nga planted lamang ang ebedensya nga nakuha kaniya.
Nasayran nga napreso kini human makuhaan ug mga iligal nga drogas. Sa pagkakaron anaa naka confine si Gimpeso sa Vicente Sotto Memorial Medical Center gumikan sa mga bun-og nga naangkon niini human sa iyang pag ambak sa paril aron nga makaikyas.
Mipasalig naman si Tumulak nga pa imbestigahan niini ang alegasyon ni Gimpeso.Giawhag usab ni Tumulak ang Commission on Human Rights nga mutabang sa imbestigasyon kabahin sa giingong pag dagmal sa mga piniriso sa Cebu City Jail.
