Mag-atubang og kasong kalapasan sa Republic Act 7581 o ang Price Act ang usa ka lalaki human kini masikop gumikan sa pagmaligya niini og overpriced thermal scanner atol sa entrapment operation nga gipahigayon sa Regional Intelligence Division (RID) sa PRO-7 kagahapon sa may Panagdait, Brgy. Mabolo, dakbayan sa Sugbo.
Naila ang dinakpan nga si Henry Te, 40 anyos ug residente sa Brgy. Zapatera, sa susamang dakbayan.
Matud ni PCapt. Romeo Caacoy, ang team leader sa Regional Intelligence Division positibo kini nga napalitan sa ilang undercover nga pulis sa thermal scanner nga hilabihan ka mahal.
Nasuta nga gibaligya kini sa dinakpan sa kantidad nga P4,500 inay nga tag P3,400 lang ang suggested retail price o SRP niini.
Nakuha sa operasyon ang 27 ka mga thermal scanners.
Gipahibalo usab ni Caacoy ang naasoy nga operasyon ang follow up operation sa nahitabo usab nga dakop sa Barangay Banawa ug Barangay Kinasang-an Pardo gumikan gihapon sa over price selling.
Padayon usab nga nagpakahilom ang dinakpan ug nagdumii kini sa pahghatag sa iyang habig. (fdp)
