PILIPINAS-Gilusad sa gobyerno ang nationwide rice price monitoring aron masuta ang epekto sa pagkunhod sa taripa sa imported nga bugas sa tibuok supply chain gikan sa mga importer ngadto sa retailers.
Sa usa ka pahayag nga giluwat sa Department of Trade and Industry, sa pakigtambayayong sa Department of Agriculture, nga naglunsad sa extended price monitoring initiative nga naglangkob sa halapad nga retail markets, lakip na ang mga supermarket, hypermarkets ug grocery stores ubos sa hurisdiksyon sa DTI ingon man sa mga wet market nga sakop sa DA.
Matod ni Trade Secretary Alfredo Pascual, magpabiling matinud-anon ang departamento sa hugot nga pagmonitor ug pagtuki sa nag-usab-usab nga presyo sa bugas sa merkado.
Kahinumduman nga unang giisyu ni Presidente Ferdinand Marcos Jr. niadtong Hunyo ang Executive Order No. 62 alang sa paglaslas sa taripa sa bugas humay gikan sa 35% ngadto sa 15% ingon man ang taripa sa ubang produkto sa agrikultura.
