Nagsugod na ang preseason sa National Basketball Association (NBA), duha ka semana sa dili pa ang opisyal nga pagsugod sa 2025-2026 Season.
Ang New York Knicks ug Philadelphia 76ers, ang duha sa labing dagkong mga team sa Eastern Conference ang unang nagsangka.
Gisundan kini sa duwa tali sa Los Angeles Lakers ug Phoenix Suns, duha ka Western Conference teams nga parehong gipangulohan sa mga all-stars sa NBA.
Sa duwa tali sa Knicks ug sa Sixers, ang sentro sa Knicks nga si Mitchell Robinson milangkat og 16 ka rebounds sulod lang sa 18 minutos ingon man nga miiskor sab og syete puntos ang bigman.
Gidominar sa Knicks ang duwa ug mibulsa og 15 puntos nga kadaugan, 99-84.
Sa duwa tali sa Lakers ug sa Suns, gipildi sa Arizona team ang LA sa final score nga 103-81.
Ang kadaugan sa Phoenix gipangulohan sa beteranong guard nga si Devin Booker, kinsa miiskor og 24 puntos ug pito ka assists sulod sa 25 minutos nga pagduwa.
Base sa schedule sa NBA, kapin sa 60 ka preseason games ang gikatakdang molungtad hangtod sa Oktubre 18.
Ang matag team mopahuway og pipila ka adlaw sa dili pa magsugod ang bag-ong season sa Oktubre 22.
