Giresponderan sa mga sakop sa Bureau of Fire Protection (BFP) sa managlahing insidente sa sunog nga miulbo sa dakbayan sa Sugbo gahapon sa hapon, Pebrero 13, 2026.
Unang naalarma ang Mabolo Fire Sub-Station alas 2:50 sa hapon human miulbo ang kalayo sa 7th Road, North Reclamation Area, Barangay Carreta.
Tungod sa paspas nga pag-ulbo, daling misaka sa unang alarma ang maong sunog alas 2:56 sa hapon diin naugdaw ang lima ka istruktura nga gi-okupahan sa KQT Hauling Services ug gipanag-iya ni Kingswell C. Dy.
Samtang gipakgang sa mga bombero ang kalayo sa maong dapit, laing fire alert ang nadawat sa mga otoridad human usab miulbo ang usa ka sunog sa bahin sa Robinsons Fuente kagahapon sa kapin alas 5:00 sa hapon.
Ang maong hitabo sa Fuente Osmeña daling nakahatag og kabalaka sa mga motorista ug mga tawo sa dapit, samtang ang CCDRRMO ug mga responders sa BFP daling nilihok aron dili na mokatap pa ang kalayo sa maong sikat nga establisamento.
Samtang ang insidente sa Barangay Carreta, moabot sa pito ka indibidwal ang daling gipabakwit ug swerte nga walay narekord nga naangol o nakalas.
Ingun man nga nadeklarar kini nga “fire out” ang sunog sa North Reclamation Area alas 3:14 sa hapon diin gibanabana nga moabot sa ₱300,000 ang danyos sa kabtangan.
Sa pagkakaron, padayon pa ang gihimong imbestigasyon sa mga otoridad aron sayron ang tinuod nga hinungdan sa maong duha ka sunog nga dungan nga miigo sa dakbayan.
