Moduso ang National Food Authority (NFA) aron makabaton og emergency powers o special power aron direktang ibaligya ang mas barato nga bugas sa publiko taliwala sa nagkataas nga presyo niini.
Gusto sa NFA nga wagtangon ang mga “middlemen” ug ibaligya direkta sa merkado aron mapaubos ang presyo sa bugas.
Tumong usab sa ahensya nga mapadali ang pagpalit og bugas gikan sa mga lokal nga mag-uuma ug mapadali ang paggaling niini.
Plano karon sa NFA nga ibaligya ang bugas sa presyo nga ₱33 hangtod ₱36 matag kilo sa mga local government unit ug mga tindahan sa Kadiwa, nga mahimong ibaligya sa publiko sa mas barato nga presyo kumpara sa commercial rice.
Ubos sa Rice Tariffication Law (RTL), limitado ang gahom sa NFA, diin sa pagkakaron, ang bugas sa NFA gibaligya una sa Food Terminal Inc. (FTI) o Local Government Units (LGUs) sa dili pa makaabot sa mga sentro sa Kadiwa.
Tungod kay puno na ang mga bodega sa NFA, kinahanglan nilang ipagawas ang mga daan nga buffer stock aron mahatagan og dalan ang bag-ong mga ani sa bugas.
Ang sugyot tubag sa padayon nga pagsaka sa presyo sa bugas, nga miabot na sa ₱52 ngadto sa kapin sa ₱58 matagkilo sa pipila ka mga lugar, ug isip pagpangandam sa epekto sa dakong pagsaka sa presyo sa lana ug transportasyon.
Sumala ni NFA Administrator Larry Lacson, kon maaprobahan ang emergency power, ang ahensya mas paspas nga makainterbenir sa merkado aron maibanan ang pag-antos sa mga konsumidor.
