CEBU CITY – Gidid-an ni Cebu City Mayor Tomas Osmeña ang mga sakop sa kapulisan sa dakbayan nga magsuot og face mask sa matag police operation.
Kini human nga miisyu og memorandum order si Osmeña ngadto ni Cebu City Police Director Col. Royina Garma.
Matud ni Osmeña nga makamugna og bati nga impression sa publiko kung magtaptap ang nawong sa mga pulis.
Gihimug-atan usab sa mayor sa dakbayan sa Sugbo nga kung lehitimo ang gipahigayon nga police operation, dili na kinahanglan nga magtaptap sa ilang nawong.
Dugang pa ni Osmeña nga aduna siyay otoridad nga momando sa mga sakop sa Cebu City Police Office isip usa ka mayor.
Mipahimangno usab kini nga mag-atubang ang kapulisan og administrative ug criminal case kung dili sila mosunod kaniya.
Nasayran nga daghan ang mireklamo mahitungod sa mga pulis nga nagtaptap sa ilang nawong sa gipahigayon nga police operation gumikan kay gipasanginlan ang mga pulis nga nangawat.
Samtang wala mi-uyon ang kadagkuan sa Philippine National Police (PNP) nga nagdili sa pagsul-ob og face mask ang mga pulis ilabi na sa pagpahigayon og mga anti-drug operation.
Gipasabot ni PNP Chief Gen. Oscar Albayalde nga dili mahimong dili magsul-ob og face mask ang mga operatiba tungod sa kadelikado sa operasyon.
Matud ni Albayalde nga mga sindikato ang sagad nga kontra sa matag police operation.
Gihimug-atan usab ni Albayalde nga kun ugaling taptapan ang nawong sa usa ka sibilyan nga pulis sa usa ka police operation, kinahanglan gayud nga magpauban og naka-uniporme nga pulis.
