Gipasalig ni Department of Justice (DOJ) Secretary Jesus Crispin “Boying” Remulla nga nagpadayon ang gihimong imbestigasyon sa mga kaso batok sa pipila ka mga naglingkod nga senador karon.
Atol sa usa ka press conference, gipahayag ni Remulla nga subsob nga gisusi sa ilang opisina ang mga reklamo ug impormasyon nga mahimong lig-on nga basehan sa pagpasaka og opisyal nga kaso batok sa mga hingtungdang magbabalaod.
Mahitungod sa isyu nga naglambigit kang Senador Chiz Escudero, miingon ang kalihim nga anaa pa kini sa fact-finding stage, diin gisusi pa ang mga dokumento ug mga ebidensya nga ilang nadawat.
Gipasabot ni Remulla nga gikinahanglan ang maampingong pag-validate sa mga nadawat nga impormasyon tungod kay dili tanang materyales nga moabot kanila daling kasaligan o igo na nga mamahimong basehan sa kaso.
Nasayran nga nalambigit ang ngalan ni Escudero sa imbestigasyon kalabot sa giingong mga anomalya sa mga proyekto sa flood control.
Samtang sa pikas bahin, gipahayag usab ni Remulla nga nagpadayon na ang pag-andam sa pormal nga kaso batok ngadto kang Senador Joel Villanueva.
