Gikonsiderar ni Ombudsman Jesus Crispin “Boying” Remulla nga usa ka “ghost electricity” case ang giingong kapakyasan sa Solar Energy Network Inc., nga nalambigit kang Batangas 1st District Rep. Leandro Leviste, sa pagtuman sa gisaad nga produksiyon sa elektrisidad alang sa nasud.
Sa usa ka press conference, giingon ni Remulla nga sama sa mga “ghost flood control projects,” ang maong kaso nagpunting sa giingong wala matuman nga saad sa kompanya ubos sa prangkisa nga gihatag sa gobyerno ug sa Philippine Energy Plan.
Matod kaniya, ang kapakyasan sa kompanya mahimong usa sa mga hinungdan nga nagpabiling taas ang presyo sa kuryente sa nasud, tungod sa wala maabot nga gipaabot nga produksiyon sa enerhiya.
Kahinumdoman nga gipahibalo ni Remulla ang pagsang-at og mga reklamong plunder, graft and corruption, ug conflict of interest batok kang Rep. Leandro Leviste.
Lakip usab sa giapil sa reklamo ang iyang inahan nga si Senador Loren Legarda ug kanhi Department of Energy Secretary Alfonso Cusi.
