CENTRAL VISAYAS-Nasikop sa mga otoridad ang kinatibuk-ang 835 ka mga suspek uban ang pagkakumpiskar sa dul-an P57-million nga balor sa ilegal nga drugas sa bag-o lang nahuman nga usa ka semana nga operasyon sa kapulisan sugod niadtong Oktubre 29.
Ang coverage sa seguridad ug ang agresibong mga operasyon gidesinyo isip kabahin sa gipausbaw nga pagpangandam sa seguridad alang sa hapsay ug malinawon nga pagsaulog sa Semana Santa 2024.
Samtang, ang maayong gitun-an nga pamaagi sa seguridad gipatuman sa tibuok rehiyon aron masiguro nga ang mga konstituwente sa Central Visayas adunay luwas nga pagsaulog sa Undas 2024.
Matud ni Regional Director Police Brigadier General Anthony A Aberin, nga kasagaran sa mga nasikop nga mga suspek kay nalambigit sa illegal nga sugal nga adunay kinatibuk-an nga 412 ka mga nasikop sa maong panahon.
Nasakmit usab ang kinatibuk-ang kwarta sa sugal nga nagkantidad og P35,476.00 ug uban pang mga paraphernalia.//
Ang mga agresibong operasyon batok sa ilegal nga drugas miresulta usab sa pagkasikop sa 214 ka mga drug personalities ug pagkasakmit sa 8,374.34 gramos sa gituohang shabu nga mobalor og P56,945,512.00 uban sa ubang drug paraphernalia.
Samtang, malampusong naserbisyuhan ang pagpatuman sa warrant of arrest nga gipagawas sa korte ngadto sa 33 ka most wanted persons ug 157 ka laing wanted persons.
Ang gipakusgan nga kampanya batok sa loose firearms misangpot usab sa pagkasikop sa 18 ka mga suspek ug pagkarekober sa 57 ka wala rehistrado ug ilegal nga paghupot og armas.
Dugang pa, nga ang tanang mga ebidensiya nga nasakmit gisumiter ngadto sa Forensic Unit alang sa pagtuki samtang kining mga dinakpan nga mga suspek kasamtangang gitanggong alang sa tukmang pagpasaka og kaso sa korte.
