CEBU – Nipadayag og paglaom ang usa ka opisyal sa Department of Education (DepEd)sa dakbayan sa Sugbo nga ang 4,000 ka mga magtutudlo nga miserbisyo niadtong Mayo 9 nga piniliay makadawat unya og labaw sa P5,000 nga suhol nga gisaad kanila.
Matud pa ni Dr. Rhea Mar Angtud,ang City Schools Division Superintendent, nga kadaghanan sa ilang mga magtutudlo nihatag ug taas nga oras aron makompleto ang proseso sa pagbotar ug ang pagpasa sa mga resulta sa eleksiyon human ang pipila sa mga vote counting machines nagsugod na sa pag-malfunction.
Dugang pa ni Angtud, nga ang mga magtutudlo nga nagserbisyo sa eleksyon, gilauman nga makadawat og P5,000 isip election duty honoraria.
Apan aduna nay nag-ung-ong nga hangyo gikan sa DepEd nga magpagawas og dugang P3,000 alang sa mga magtutudlo nga nagserbisyo og dugang oras aron sa pagdumala sa mga technical glitches ug ubang mga isyu kalabot sa pagpahigayon sa Mayo 9 nga piniliay.
Matud pa ni Angtud,nga ang mga magtutudlo angayan sa dugang suweldo sanglit ang uban kanila kinahanglang motrabaho lapas sa tungang gabii aron masiguro nga madala sa husto ang resulta sa piniliay ngadto sa Comelec canvassing center.
