Giawhag ni Mandaue City Mayor Thadeo Jonkie Ouano, ang mga miyembro sa konseho sa Mandaue City Hall nga mupanday ug ordinansa nga magsilot lakip ang ginikanan sa masakpang magvandal o mahugaw-hugaw sa mga nag-unang pampublikong lugar sa dakbayan.
Matud ni Ouano, nga miduso siya og proposed ordinace ngadto sa pipila ka mga konsehales aron mapatuman ang pagpahamtang sa mga menor de edad lakip ang mga ginikanan kung ugaling madakpan sa paghugaw-hugaw sa siyudad.
Hinungdan nga gipahunong una sa mayor ang pagpahigayon og clean up program sa tibouk dakbayan gumikan kay matud niini masayang ra gihapon ang gibuhat sa kagamhanan og padayon nga adunay makalapas sa pagbawal sa bandalismo
Usa sa nakitang mga hagit sa pagpahamtang mao ang pagkamenor de edad sa mga masakpan, hinungdan nga aron mas hugot nga mapatuman ang pagdili sa bandalismo, lakip nga ipadakop ang ginikanan, sa samang paagi mapugngan ang mismong mga kalapasan.
Kahinumdoman. nga nailhan na sa lokal nga kagamhanan sa Mandaue ang menor de edad nga lalaki nga nakita sa closed circuit television (CCTV) nga nag-vandalize sa usa ka pampublikong tunghaan sa siyudad niadtong Hunyo 10 sa kaadlawon.
Gipasiugda ni Mayor Jonkie nga magpadayon ang siyudad sa pagmonitor sa mga nakalapas sa balaod aron masiguro nga matuman ang angay nga silot ug intervention, sa koordinasyon sa mga barangay.
