CEBU – Ipasirado ni Cebu City Mayor Edgardo Labella ang mga pharmacy sa dakbayan sa Sugbo nga mupahimulos sa kahigayonan nga mamaligya ug surgical mask sa hilabihan ka taas nga kantidad.
Kini human nga nakadawat ug report ang mayor nga misaka na ang presyo sa maong mga mask.
Subay niini, gibutyag ni DTI 7 Senior Trade Industry Dinah Gladys Oro, nga makamulta ug P5000 ngadto na sa P1-million kung mapamatud-an nga nag-overpricing sa mga surgical mask.
Giingong barato lang ang mga mask apan adunay mga report nga nadawat nga mimahal kini human nga miboto ang isyu sa 2019 N-CoV.
Matud ni Oro nga adunay mga sakop karun sa DTI nga naka-plain clothes diin nag-roving sa nagkadaiyang pharmacy arun masuta ang mga nag-overpricing.
Kung masakpan nga nag-overpricing giingong mag-atubang kini ug penalty apan sa gihapon ipaagi una sa ‘due process’.
Hinuon, sa pagkakarun, wala pa may naaktohan ang DTI sa mga nagpahimulos nga mga pharmacy.
