PROVINCE OF BOHOL- Mikabat sa P17.2-milyones sa illegal nga drogas ang nasakmit sa mga sakop Police Drug Enforcement Unit (DEU) sa Bohol Police Provincial Office (BPPO) atol sa anti-drugs operations niini niadtong adlaw nga Sabado, Nobyembre 9, 2024.
Ang una nga operasyon kay gipahigayon sa Provincial Intelligence Unit sa Barangay Guiwanon, lungsod sa Tubigon, probinsya sa Bohol diin miresulta sa pagkasikop sa usa ka high-value individual (HVI).
Giila ang suspek nga si Danilo Refulle Jr., alyas “Melo”, 25-anyos ug lumulupyo sa Purok 4, Barangay Pooc Oriental, lungsod sa Tubigon diin nakuhaan kini sa mga dagkong pakete sa gituohang shabu nga giputos sa usa ka ininsik nga “tea bag”.
Mitimbang kini og duha ka kilo nga adunay estimated standard drug price sa P13.6-milyones.
Matod pa nga si Refulle naila nga drug personality sa Tubigon ug nag-supply og ilegal nga drugas sa mga kasikbit nga lungsod.
Gikataho nga gisunod niya ang tunob sa iyang amahan nga usa usab ka drug pusher nga namatay atol sa war on drugs, samtang ang iyang uyoan nga nalambigit usab sa ilegal nga drugas, kasamtangang anaa pa sa Abuyog Penal Farm sa probinsya sa Leyte.
Gituohan nga ang iyang uyoan, bisan napriso, padayong tinubdan sa ilegal nga drugas niini.
Samtang sa laing operasyon nga gilusad sa mga kapulisan kay laing HVI ang nasikop sa lungsod sa Dauis, probinsya sa Bohol.
Giila ang dinakpan nga si Arvin Embradura, 42-anyos ug lumulupyo sa Purok 9, Habitat, Barangay Tabalong, lungsod sa Dauis.
Kung diin nakuha kaniya ang mga pakete sa shabu nga gisulod usab sa usa ka ininsik nga “tea bag”.
Anaa sa 530 gramos nga adunay estimated standard drug price sa P3.6-milyones.
Lain nakuha kang Embradura kay usa ka kalibre 9mm ka pistola.
Nagtuo ang Bohol Police Provincial Office nga ang P300 milyones nga balor sa drugas nga nasakmit sa Leyte niadtong milabay nga adlaw posibleng konektado sa mga nakit-an sa Bohol tungod sa susamang putos.
Palagman pa sa kapulisan ang ilahang imbestigasyon, aron masubay ang tinubdan sa drugas nga misulod sa lalawigan sa Bohol.
