Mukabat sa P17.7 million nga kantidad sa shabu ang nasakmit sa kapulisan gikan sa duha ka mga buybust operation nga gipahigayon sa Barangay Basak San Nicolas ug Bulacao, Pardo ning dakbayan sa Sugbo.
Unang operasyon nga gipahigayon sa Barangay Basak San Nicolas diin nasikop si Ariel Lipumano, 32 anyos ug residente sa Barangay Bulacao, Talisay City, diin nakuha-an kini ug duha ka kilo nga shabu nga nagkantidad ug P13.6 million.
Si Lipumano kay anaa sa listahan sa Regional Level watchlist sa mga drug personalities, apan wala na kini mo komento sa pasangil nga nalambigit kini sa iligal nga drogas.
Nasayran nga maka-dispose kini ug usa ka kilo nga shabu matag semana sa Barangay Tisa, Pardo, Mambaling ug Basak San Nicolas.
Sa pagkakarun kay nagtingkagol sa Mambaling Police Station ang dinakpan samtang gihikay ang kaso nga ipasaka batok kaniya.
Samtang, sa ikaduhang anti-illegal drug operation kay nasikop usab si Ramil Gabaca, 29 anyos, usa ka habal-habal driver human nga nakuhaan ug 605 grams nga shabu diin nagkantidad kini ug P4.1 million.
Nasayran nga duha ka higayon na nga nadakpan si Gabaca gumikan sa gihapon sa iligal nga drogas niadtong Disyembre 2022 ug ning kasamtangan nga buwan kay gibuhi-an kini human nga mi-avail ug plea bargaining agreement.
Ang maong dinakpan kay naghimas-rehas usab sa holding facility sa Cebu City Police Office.
