CEBU CITY– Mukabat sa P2.4-M ang danyos sa nahitabong sunog sa may Sitio Tarnate ug Sitio Bayabas sa Brgy. Ibabao-Estancia Mandaue, City, Cebu niadtong Sabado, Pebrero,21,2020.
Nadawat sa mga bombero ang alarma pasado alas 11 sa buntag kung diin gisaka kini sa Task Force Alpha pasado alas 12 ug hingpit na napawong pasado alas 2 na sa hapon.
Gilamon sa kayo ang kapin 300 ka mga balay kung diin 13 niini ang partially damaged.
Matud sa fire investigator nga si SFO1 Jade Roble sa Mandaue City Bureau of Fire Protection nga under investigation pa ang hinungdan nga sunog. Basi usab sa mga taho sa mga nasunugan nga usa ka butane ang giingong mibuto, apan aduna usab nag-ingon nga usa ka bata ang nagduwa og posporo ang hinungdan.
Wala hinooy nataho nga namatay sa nahitabong sunog apan dunay usa ka natalang injured nga naila nga si Yogi Arquiza kinsang naka-angkon og first degree burn sa iyang walang abaga.
Gihiklin na usab ang mga nasunugan sa Brgy. Ibabao-Estancia Gym kung giin gipahigayon usab ang final listing.
Mibisita na usab si Mandaue City Mayor Jonas Cortes sa mga nabiktima sa sunog ug mihatag kini og 14,000 pesos cash assistance.
Samtang, gisiguro usab ni Brgy. Ibabao-Estancia Kapitan Romulo Echavez nga mahatagan dayon og ayuda ang iyang mga konstituwente ug misaad kini nga magpahigayon na gyud sila og reblocking butang nga usa usab sa ilang nakita nga solusyon aron malikayan ang mga panghitabo sama sa sunog.
Nasayran nga ikatulong higayon na nga nasunugan ang naasoy nga area.|reports from Bombo Joan Gantalao
