Gipahibalo ni Department of Agriculture Secretary Francisco Tiu Laurel Jr. ang pagpatuman sa pagbaligya sa P20 matag kilo sa bugas sa Visayas region.
Kini human sa closed-door meeting uban ni Presidente Ferdinand ”Bongbong” Marcos Jr. ug sa 12 ka mga gobernador sa Visayas sa Cebu Provincial Capitol.
Subay usab kini sa target sa Department of Agriculture (DA) nga mabaligya sa P20 pesos matag kilo sa bugas sa tuig 2028.
Sa direktiba ni Presidente Ferdinand Marcos Jr. ngadto sa ahensya nga himuong long-term nga paningkamot ang pagbaligya sa baratong bugas.
Matod ni Agriculture Secretary Francisco Tiu Laurel Jr., ang unang plano mao ang pagbaligya sa baratong bugas hangtod sa Disyembre ning tuiga o kaha lugwayan pa kini hangtod sa Pebrero sa sunod tuig.
Gidugang ni Laurel nga nasabutan sa tigom uban sa Presidente nga ang mga taga Visayas makapalit og 10 ka kilo nga baratong bugas matag semana o 40 ka kilo matag buwan.
Matod niya nga nadesisyonan nga ipatuman ang pilot nga implementasyon sa programa sa Kabisay-an tungod kay daghang mga Cebuano nga mas nagkinahanglan og barato nga bugas.
Gipaniguro usab ni Laurel nga aduna silay igong stock o tipiganan sa bugas sa Visayas region, apil na ang Iloilo City.
Gani sa kinatibuk-an aduna na silay 358,000 ka tonelada nga bugas sa ilang nagkalain-laing bodega nga matud pa niya kinahanglang i-release kay ting-ani na.
