CEBU CITY-Giaprobahan sa Cebu City Council ang resolusyon nga gisang-at ni City Councilor Phillip Zafra kabahin sa garbage collection and disposal program sa Siyudad ug ang pagpamalit og mga materyales alang sa street lighting karong tuiga.
Nasayran nga ang konseho miuyon sa pagpagawas sa P319 milyones, nga mikabat sa halos 100 porsiyento sa kinatibuk-ang budget, alang niini nga mga katuyoan.
Ingon man nga atol sa gitumbok nila ni City Councilors Nestor Archival ug Jocelyn Pesquera nga adunay ordinansa nga naglimite sa pagpagawas sa pundo alang sa usa ka programa gikan sa giaprobahan nga annual budget ngadto sa maximum nga 75 porsiyento.
Ang iyang orihinal nga resolusyon naglakip sa P500,000 alang sa mga maintenance ug uban pang mga operating expenses sa Department of Public Services.
Matud pa nga mamahimong mohunong na ang DPS sa pagpalit og mga spare parts nga dili na kinahanglan ug walay budget nga igasto.
Samtang, nangatarungan usab si Zafra, ang chairman of the committee on peace and order nga ang pag-release sa pundo sa kinatibuk-an makaseguro nga walay babag sa frontline services sa Cebu City Government, sama sa garbage collection ug disposal, apil na ang mahinungdanong serbisyo sa JO personnel.
Sa iyang amendment resolution, si Zafra niuyon nga tangtangon ang P500,000 alang sa MOOE ug ang P5 milyones alang sa mga suplay ug materyales sa mga sakyanan.
Hinuon, niinsister kini nga ipagawas ang 100 porsiyento sa P300 milyones nga budget alang sa pagkolekta ug paglabay sa basura ingon man ang P15 milyones alang sa street lighting materials.
