LAPU-LAPU CITY,CEBU- Nasakmit gikan sa usa ka 50-anyos nga babaye ang lima ka kilo sa gituohang shabu nga mobalor og P34 milyones atol sa buy-bust operation sa Pakpakan Road, Barangay Basak sa dakbayan sa Lapu-Lapu Lunes sa gabii, Mayo 19, 2025.
Sa pakighinabi sa Bombo Newsteam kang Police Lt. Col. Christian Torres, ang tigpamaba sa Lapu-Lapu City Police Office, gitino niini nga ang malampusong operasyon hiniusang gihimo sa City Intelligenceb Unit, City Drug Enforcement Unit, Mobile Patrol Unit sa Lapu-Lapu City Police Office (LCPO), Regional Special Enforcement Team, Regional Intelligence Unit (RIU), Regional Intelligence Division (RID), ug Philippine Drug Enforcement Agency Region 7 (PDEA-7), lini nagtimaan nga ikaduha nga pinakadako nga drug-haul karong bulana.
Dugang pa, nga ang nasikop nga 50-anyos nga suspek giilang si alyas “Chill,” residente sa Deca Homes, Barangay Basak, dakbayan sa Lapu-Lapu.
Nasakmit gikan sa iyang possession ang gibana-banang lima ka kilong gidudahang shabu, nga gisulod sa katorse (14) ka sealed transparent plastic sachet, nga adunay standard nga presyo nga nagkantidad ug Php34,000,000.00.
Narekober usab ang usa (1) ka backpack ug usa (1) ka unit sa Vivo cellular phone.
Ang nasikop nga suspek kasamtangang gitanggong sa LCPO custodial facility samtang giandam na ang tukmang kaso nga ipasaka sa korte.
Subay niini, si PBGen REDRICO A MARANAN, Regional Director, PRO7, midayeg sa hugot nga pasalig sa pagwagtang sa presensya sa ilegal nga drugas sa dakbayan, nga nagpasiugda sa dakong epekto niini sa pagsiguro sa kaluwasan ug kaayohan sa komunidad.
