CENTRAL VISAYAS-Mokabat sa kapin sa P374.6 Million nga kantidad sa illegal nga drugas ang gisunog sa Philippine Drug Enforcement Agency 7 ug sa kapulisan sa Central Visayas sa thermal facility sa usa ka funeral home sa Junquera, dakbayan sa Sugbo, Huwebes Hunyo 6, 2024.
Ingon man nga mao kini ang unang higayon karong tuiga sa pagguba sa mga ebidensya sa mga kaso nga hapit na mahuman ug aduna na’y pagtugot sa korte diin gipangulohan sa PDEA 7 uban sa mga ahensya sa gobyerno nga misaksi sa maong pagsunog.
Matud sa buhatan sa PDEA-7 nga moabot ngadto sa P374,629,250.99 nga kantidad sa illegal nga drugas ang gipang sunog.
Diin ang labing dako niini mao ang shabu nga adunay P373,034,153.84, nga gisundan sa Ephedrine nga mo balor sa P1,156,800.00, samtang ang Marijuana nga mo kantidad sa P284,002.48 ug uban pa nga illegal nga drugas.
Gipaambit ni PDEA-7 Director Emerson Margate nga ang labing daghan nga naguba nga ebidensya kay mao ang mga kaso nga anaa Regional Trial Court Branch 57 sa dakbayan sa Sugbo nga moabot ngadto sa kapin 15 ka kilo sa shabu.
Gani aduna pa’y laing mga illegal nga drogas nga nagkantidad usab og minilyon nga gikatakdang sunugon sa susamang pasilidad human nga mihatag sa iyang pagtugot si Honorable Judge Anna Marie Militante ang Presiding Judge sa RTC Branch 53 sa dakbayan sa Lapu-Lapu.
Gihatagan usab og gibug-aton ni Margate nga ang maong pagsunog sa mga ebidensya arun sa pagpakita nga ang mga drogas nga anaa sa kustodiya sa PDEA 7 ug sa mga buhatan sa kapulisan sa Central Visayas nga misunod sila sa proseso.
Ingon man arun mapamatud-an ang mga pagduda nga giingong gi re-cycle ang ilang nakuhang illegal nga drugas gikan sa mga drug personalities.
Dugang pa sa opisyal nga lisod buhaton ang pag re-cycle sa mga ebedensya sanglit hugot nga gi-monitor sa korte lakip na sa mga evidence custodian.
