CEBU CITY-Malampuson nga nasakmit sa City Intelligence Unit sa Cebu City Police Office atol sa gipahigayon nga buy-bust operation ang motimbang nga 705 grams sa gituohang shabu nga mobalor og P4.7 milyones sa Villalon Drive, Barangay Capitol Site, ning dakbayan sa Sugbo.
Giila ang High-Value Individual nga si Niel Michael Espina alyas ‘Mike’ nga taga Barangay Gutlang, Argao Cebu.
Matud pa ni Police Colonel Ireneo Dalogdog, ang City Director sa CCPO nga gipaubos ang maong suspetsado og surveillance sulod sa kapin tulo ka semana human nga mitumaw ang iyang pangalan sa Argao nga nalambigit kini sa iligal nga drogas.
Dugang pa sa opisyal base sa ilang nadawat nga impormasyon nga ang source ni Mike anaa natanggong sa National Bilibid Prison, kinsang giingong usa ka iladong drug personality.
Ingon man nga ang maong nadakpan maka-dispose og 500 grams ngadto sa 1 ka kilo nga gituohang shabu sa usa ka semana sa main area nga Argao ug sa mga kasikbit nga dapit sa dakbayan sa Sugbo.
Subay niini, mipasalig ang mga sakop sa kapulisan nga padayon ang ilang pakigbisog nga hingpit nga matuldukan ang mga iligal nga drogas ug pagtumbok kung asa gikan ang mga gituohang shabu nga nakalusot sa Syudad.
