CEBU CITY-Mokabat sa 500 gramos sa iligal nga drugas nga mobalor og P4 milyones ang nasakmit gikan sa usa ka high-value individual ug kauban niini nga taga lungsod sa San Remegio sa amihanang Sugbo.
Atol sa gipahigayon nga operasyon sa mga operatiba sa National Bureau of Investigation Central Visayas, nasikop ang mga suspetsado nga sila si Leo Montealto, 45-anyos, ug si Richel Banga-Banga, 33-anyos nga lumulopyo sa Sitio Bungtod, Barangay Calambua, lungsod sa San Remigio, amihanang Sugbo.
Nasayran nga ang nadakpan usa sa mga nagsuplay og iligal nga drogas sa daghang lokalidad sa amihanang Sugbo.
Matud pa ni NBI Cebu District Office Agent-in-Charge, Arnel Pura, mikabat sa usa ka buwan ang ilang gipahigayon nga surveillance operation human makadawat og intelligence report bahin sa giingong pagpamaligya og drugas sa naasoy nga dapit.
Gibutyag usab ni Pura nga ang duha bag-o lang nakagawas sa Bogo City Jail, diin sila natanggong sukad niadtong 2011 tungod sa mga kalapasan nga naglambigit sa gihapon sa iligal nga drogas ug hinagiban.
Apan, wala kini mitagam ug mibalik sa matang sa iligal nga kalihokan hinungdan nga daling gipaubos sa obserbasyon ang mga nadakpan usa gilusad ang anti-illegal drug operation.
Narekober gikan sa mga suspek ang 10 ka mga dagkong putos sa gituohang shabu, mga cellphone ug drug paraphernalia, lakip na ang logbook nga adunay listahan sa mga pangalan nga gituohan sa NBI nga pipila sa mga kliyente sa mga suspek ug daling nasikop ug gipaubos sa drug test.
Ingon man nga duha niini ang nagpositibo diin gitanggong usab alang sa dugang nga impormasyon samtang ang nahabilin nga walo nga nagnegatibo gibuhian pagkahuman.
